ГУЫЦМÆЗТЫ АЛЕШЫ МЫСÆН ИЗÆР

Версия для слабовидящих




25 азы размæ гуырдзиаг агрессорты нæмыгæй фæмард  Гуыцмæзты Алеш, 20 -æм æнусы дыккаг æмбисы ирон литературæйы курдиатджындæр прозаиктæй сæ иу. 

Уый фæдыл уыдис мысæн изæр  Цæгат Ирыстон –Аланийы Национ наукон чиныгдоны.  Фысджытæ, скъолаты æмæ уæлдæр ахуыргæнæндæтты ахуыргæнджытæ, студенттæ, театралон аивады архайджытæ, техникон  интеллигенцийы минæвæрттæ, Гуыцмæзты Алешы æрдхæрттæ æмæ чиныгкæсджытæ уыйбæрцæй æрбамбырд сты Алешы рухс ном ссарынмæ, æмæ  егъау залы адæмæй къухбакæнæн нæ уыдис.

Ныхасгæнджытæ дæр дзæвгар уыдысты – Ходы Камал, Хъазиты Мелитон, Кокайты Тотрадз, Дзасохты Музафер, Къусраты Анатоли, Къадзаты Станислав. æрымысыдысты йын йæ  рæсугъд дзырд ,йæ арф хъуыды, йæ хæдæфсарм фæлгонц.  

Алеш стыр дæсны басгуыхт адæймаджы миддуне райхалынмæ. Уый бæрæг дары йæ алы прозаикон уацмысы дæр, фæлæ иууыл хуыздæр та «Дæ уды фарн», зæгъгæ, уыцы романы. 2010 -æм азы роман тæлмац æрцыд уырыссаг æвзагмæ, «Матрона», зæгъгæ, ахæм номимæ. Раивта йæ  зынгæ фыссæг Тотраты Руслан. Мæнæ цы фыссы уый чиныджы разныхасы: « Роман «Дæ уды фарн» æнæмæнг æрæвæрын хъæуы дунейы хуыздæр уацмысты æмрæнхъ. æцæг, чысылнымæц адæмы минæвар кæй ныффысса, уый цыфæнды диссаг куы феста, уæддæр ын ныры дуджы нæй æнæхъæн дунейы зындгонд суæвыны фадат. Уæлдайдæр та йæ автор йæхæдæг удæгас куынæ уа, уæд».    

Мысæн изæр сæ    ирд курдиатæй срæсугъд кодтой Цæгат Ирыстоны паддзахадон филармонийы зарæггæнджыты къорд Дзанайты Ольгæйы разамындæй, музыкалон къорд «Монзæл»-ы  архайджытæ Тедеты Иринæ æмæ Бесаты Данæ, Хуссар Ирыстоны паддзахадон театры актрисæ Бекъойты Зæринæ, Дзæуджыхъæуы 13-æм скъолайы адæмон сфæлдыстады  къорд «Талатæ», сæ сæргълæууæг -Танделаты Розæ.