logo

М О Я    О С Е Т И Я



Ломиа Константин
абхазаг поэт

Астрæнхъонтæ

У адæмы зонд уаз чиныг, бæгуыдæр,
æгæрон у, æвидигæ — йæ фарн.
Рæстæджытæ, æмгъуыдтæ йыл сæ гуыдыр
Нæ сæвæрдзысты, не суыдзæн æбар.

Нæ судзы арты, сау хъоргъы нæ мæлы,
Нæ йын и фидис, тобæ æмæ сар!..
Йæ арв-хъæбысмæ хуры тын нызгъæлы,
Йæ арт-хъæбысæй азгъæлы мæйдар.

                          * * *
Багада-хох... Бæрзонд фæцыд йæ рындз,
Йæ рæбын та æрдзæ-æрдзæтæй дуртæ
Æнцъылдтæ ’мæ ыздыхстытæй хуыссынц,
Цыма фыддуджы амæддаг лæппутæ.

“Цы тох уыд ам, цы заманты?..” — Ныхъхъус,
Ныммыр сæ хъæлæс сау дурты рæдзæгъдтæн…
Нæ сын у кæд уысмæй фылдæр æнус?!.
Сæ иу дæр мын йæ риссæгтæ нæ зæгъдзæн…

                          * * *
Æфсæйнаг пецау, арв ысзынг — сырх зæрин,
Уæлхохæй, зæгъгæ, иу цæхæр фæхауд,
Уæд дун-дуне æрвнæрæгау ныннæрид,
æвиппайды ныггуыпп ласид, хъæмпау.

æхсæры къутæр донырдæм фæгуыбыр,
Ыстæнæг дон, фæзынхæссæн йæ уаргъ.
Гæзæмæты ма сулæфы сыгъд быдыр,
Йæ базыр æм куы бацæйтилы маргъ.

* * *
Хуры хъарм та цадæггай æрмынæг,
Хус сыфтæр æрызгъæлди, æрхызт.
Рафæлгæсыд арвы цъæх æрдынæг,
Гом фæрвытыл байтыгъта йæ хыз.

Батымбылтæ уазалы, ныккука
Афтид зæхх, хъæстытæ систа, загъд:
Сæрд дæр, дам, фæлтæхæг мæргъты цуркау,
Африкæмæ, хуссармæ фæтахт.

 

МАМЫКЪАТЫ Хъазыбеджы тæлмацтæ

Мах дуг.– 2008.– № 4.


Литература народов Кавказа:
      Абхазская
        Абхазаг æмбисæндтæ
        Абхазаг таургътæ
        Агындиа Сергей
        Аджба Таиф
        Амаршан Витали
        Аламиа Геннадий
        Ажиба Энвер
        Гогуа Алыкса
        Джинджолия Владимир
        Искандер Фазиль
        Касландзиа Валери
        Квициниа Никъала
        Лагулаа Анатоли
        Лакербай Юри
        Ломиа Константин
        Мукба Анзор
        Хашиг Никъала
        Хашба Риммæ
        Хварцкия Игорь
        Чкадуа Шота
      Армянская
      Кабардинская

Русская литература

Зарубежная литература